ਨਾਟਿੰਗਮ, 7 ਜੂਨ – ਇੱਥੇ 6 ਜੂਨ ਦਿਨ ਵੀਰਵਾਰ ਨੂੰ ਵਰਲਡ ਕੱਪ ਦੇ ਆਪਣੇ ਦੂਜੇ ਮੁਕਾਬਲੇ ਵਿੱਚ 5 ਵਾਰ ਦੀ ਚੈਂਪੀਅਨ ਟੀਮ ਆਸਟਰੇਲੀਆ ਨੇ ਵੈਸਟ ਇੰਡੀਜ਼ ਨੂੰ 15 ਦੌੜਾਂ ਨਾਲ ਹਰਾ ਦਿੱਤਾ।
ਵੈਸਟ ਇੰਡੀਜ਼ ਦੇ ਕਪਤਾਨ ਜੇਸਨ ਹੋਲਡਰ ਨੇ ਟਾਸ ਜਿੱਤ ਕੇ ਆਸਟਰੇਲੀਆ ਦੀ ਟੀਮ ਨੂੰ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਸੱਦਾ ਦਿੱਤਾ। ਪਹਿਲਾਂ ਬੱਲੇਬਾਜ਼ੀ ਕਰਨ ਉਤਰੀ ਆਸਟਰੇਲੀਆ ਟੀਮ 49 ਓਵਰ ‘ਚ 288 ਦੌੜਾਂ ਉੱਤੇ ਆਲ-ਆਊਟ ਹੋਈ, ਜਿਸ ਦੇ ਬਾਅਦ ਵੈਸਟ ਇੰਡੀਜ਼ ਸ਼ਾਈ ਹੋਪ (68) ਅਤੇ ਕਪਤਾਨ ਜੇਸਨ ਹੋਲਡਰ (51) ਦੇ ਅਰਧ ਸੈਂਕੜਿਆਂ ਦੇ ਬਾਵਜੂਦ 50 ਓਵਰ ‘ਚ 9 ਵਿਕਟਾਂ ਉੱਤੇ 273 ਦੌੜਾਂ ਹੀ ਬਣਾ ਸਕੀ ਤੇ 15 ਦੌੜਾਂ ਨਾਲ ਮੈਚ ਹਾਰ ਗਈ। ਵੈਸਟ ਇੰਡੀਜ਼ ਨੂੰ ਵਰਲਡ ਕੱਪ ਦੇ ਹੁਣ ਤਕ ਹੋਏ ਉਸ ਦੇ 2 ਮੈਚਾਂ ਵਿੱਚ ਇਹ ਪਹਿਲੀ ਹਾਰ ਝੇਲਣੀ ਪਈ ਹੈ। ਜਦੋਂ ਕਿ ਆਸਟਰੇਲੀਆ ਨੇ ਆਪਣੇ ਪਹਿਲੇ ਮੈਚ ‘ਚ ਅਫ਼ਗਾਨਿਸਤਾਨ ਨੂੰ ਮਾਤ ਦਿੱਤੀ ਤਾਂ ਉੱਥੇ ਹੀ, ਵੈਸਟ ਇੰਡੀਜ਼ ਨੇ ਪਾਕਿਸਤਾਨ ਨੂੰ 7 ਵਿਕਟਾਂ ਨਾਲ ਹਰਾਇਆ ਸੀ।
ਆਸਟਰੇਲੀਆ ਲਈ ਤੇਜ਼ ਗੇਂਦਬਾਜ਼ ਮਿਸ਼ੇਲ ਸਟਾਰਕ ਨੇ 46 ਦੌੜਾਂ ਦੇ ਕੇ 5 ਵਿਕਟ ਝਟਕੇ ਜਦੋਂ ਕਿ ਪੈਟ ਕਮਿੰਸ ਨੂੰ 2 ਵਿਕਟਾਂ ਮਿਲੀਆਂ। ਏਡਮ ਜੰਪਾ ਨੇ ਵੀ 1 ਵਿਕਟ ਲਿਆ। ਵੈਸਟ ਇੰਡੀਜ਼ ਲਈ ਹੋਪ ਨੇ 105 ਗੇਂਦਾਂ ਉੱਤੇ 7 ਚੌਕੀਆਂ ਦੀ ਮਦਦ ਨਾਲ 68 ਦੌੜਾਂ ਬਣਾਈਆਂ। ਕਪਤਾਨ ਹੋਲਡਰ ਨੇ 57 ਗੇਂਦਾਂ ਉੱਤੇ 7 ਚੌਕੀਆਂ ਅਤੇ 1 ਛੱਕੇ ਦੀ ਬਦੌਲਤ 51 ਦੌੜਾਂ ਦਾ ਯੋਗਦਾਨ ਦਿੱਤਾ।
289 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਵਿੰਡੀਜ਼ ਟੀਮ ਦੇ ਸ਼ੁਰੂਆਤੀ 2 ਵਿਕਟ 31 ਦੌੜਾਂ ਤੱਕ ਡਿੱਗ ਗਏ। ਇਵਿਨ ਲੁਈਸ (1) ਨੂੰ ਕਮਿੰਸ ਦੀ ਗੇਂਦ ਉੱਤੇ ਸਮਿਥ ਨੇ ਕੈਚ ਕੀਤਾ। ਇਸ ਦੇ ਬਾਅਦ ਕ੍ਰਿਸ ਗੇਲ (21) ਨੂੰ ਸਟਾਰਕ ਨੇ ਐਲਬੀਡੱਬਲਿਓ ਆਊਟ ਕਰ ਦਿੱਤਾ। ਹਾਲਾਂਕਿ ਗੇਲ ਨੂੰ 2 ਵਾਰ ਮੈਦਾਨੀ ਅੰਪਾਇਰ ਨੇ ਆਊਟ ਕਰਾਰ ਦਿੱਤਾ ਪਰ ਉਹ ਦੋਵੇਂ ਹੀ ਵਾਰ ਡੀਆਰਐੱਸ ਲੈ ਕੇ ਆਪਣਾ ਵਿਕਟ ਬਚਾਉਣ ਵਿੱਚ ਸਫਲ ਰਹੇ। ਗੇਲ ਨੇ 17 ਗੇਂਦਾਂ ਦੀ ਆਪਣੀ ਪਾਰੀ ਵਿੱਚ 4 ਚੌਕੇ ਲਗਾਏ। ਹਾਲਾਂਕਿ ਉਨ੍ਹਾਂ ਦੀ ਵਿਕਟ ਉੱਤੇ ਬਾਅਦ ਵਿੱਚ ਵਿਵਾਦ ਹੋਇਆ। ਸੋਸ਼ਲ ਮੀਡੀਆ ਉੱਤੇ ਇਹ ਦਾਅਵਾ ਕੀਤਾ ਗਿਆ ਕਿ ਸਟਾਰਕ ਦੀ ਜਿਸ ਗੇਂਦ (5ਵੇਂ ਓਵਰ ਦੀ 5ਵੀਂ ਗੇਂਦ) ਉੱਤੇ ਗੇਲ ਆਊਟ ਹੋਏ, ਉਸ ਤੋਂ ਪਹਿਲਾਂ ਵਾਲੀ ਗੇਂਦ ਨੋਬਾਲ ਸੀ।
ਆਸਟਰੇਲੀਆ ਦੇ ਖਿਡਾਰੀ ਨਾਥਨ ਕੂਲਟਰ ਨਾਇਲ (92) ਦੇ ਕੈਰੀਅਰ ਦੇ ਪਹਿਲੇ ਅਰਧ ਸੈਂਕੜੇ ਅਤੇ ਸਾਬਕਾ ਕਪਤਾਨ ਸਟੀਵ ਸਮਿਥ (73) ਦੇ ਨਾਲ ਉਨ੍ਹਾਂ ਦੀ ਸੈਂਕੜੇ ਵਾਲੀ ਸਾਂਝੇਦਾਰੀ ਨਾਲ ਆਸਟਰੇਲੀਆ ਨੇ ਖ਼ਰਾਬ ਸ਼ੁਰੂਆਤ ਤੋਂ ਉੱਭਰਦੇ ਹੋਏ 288 ਦੌੜਾਂ ਬਣਾਈਆਂ। 8ਵੇਂ ਨੰਬਰ ਉੱਤੇ ਬੱਲੇਬਾਜ਼ੀ ਕਰਨ ਉਤਰੇ ਕੂਲਟਰ ਨਾਇਲ ਨੇ 60 ਗੇਂਦ ਵਿੱਚ 8 ਚੌਕੀਆਂ ਅਤੇ 4 ਛੱਕੀਆਂ ਦੀ ਮਦਦ ਨਾਲ 92 ਦੌੜਾਂ ਦੀ ਪਾਰੀ ਖੇਡਣ ਦੇ ਇਲਾਵਾ ਸਮਿਥ ਦੇ ਨਾਲ 7ਵੇਂ ਵਿਕਟ ਲਈ 102 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਸਮਿਥ ਨੇ ਐਲੇਕਸ ਕੈਰੀ (45) ਦੇ ਨਾਲ ਵੀ 6ਵੇਂ ਵਿਕਟ ਲਈ ਉਸ ਵੇਲੇ 68 ਦੌੜਾਂ ਜੋੜੀਆਂ ਜਦੋਂ ਟੀਮ 79 ਦੌੜਾਂ ਉੱਤੇ 5 ਵਿਕਟ ਗੁਆ ਕੇ ਸੰਕਟ ਵਿੱਚ ਸੀ।
ਕੂਲਟਰ ਨਾਇਲ ਦੀ ਇਹ ਪਾਰੀ ਵਰਲਡ ਕੱਪ ਵਿੱਚ 7ਵੇਂ ਨੰਬਰ ਦੇ ਬਾਅਦ ਬੱਲੇਬਾਜ਼ੀ ਕਰਦੇ ਕਿਸੇ ਬੱਲੇਬਾਜ਼ ਦਾ ਸਭ ਤੋਂ ਵਧੀਆ ਸਕੋਰ ਹੈ। ਵੈਸਟ ਇੰਡੀਜ਼ ਵੱਲੋਂ ਕਾਰਲੋਸ ਬਰੈਥਵੇਟ ਸਭ ਤੋਂ ਸਫਲ ਗੇਂਦਬਾਜ਼ ਰਹੇ ਜਿਨ੍ਹਾਂ ਨੇ 67 ਦੌੜਾਂ ਦੇ ਕੇ 3 ਵਿਕਟ ਲਏ ਜਦੋਂ ਕਿ ਆਂਦਰੇ ਰਸੇਲ (41 ਦੌੜਾਂ ਉੱਤੇ 2 ਵਿਕਟ), ਸ਼ੇਲਡਨ ਕੋਟਰੇਲ (56 ਦੌੜਾਂ ਉੱਤੇ 2 ਵਿਕਟ) ਅਤੇ ਓਸ਼ਾਨੇ ਥਾਮਸ (63 ਦੌੜਾਂ ਉੱਤੇ 2 ਵਿਕਟ) ਨੇ 2-2 ਵਿਕਟ ਝਟਕਾਏ।
