ਬਰਮਿੰਘਮ, 20 ਜੂਨ – ਇੱਥੇ 19 ਜੂਨ ਦਿਨ ਬੁੱਧਵਾਰ ਨੂੰ ਵਰਲਡ ਕੱਪ ਦੇ ਲੀਗ ਮੈਚ ਵਿੱਚ ਨਿਊਜ਼ੀਲੈਂਡ ਨੇ ਆਪਣੇ ਗੇਂਦਬਾਜ਼ਾਂ ਦੀ ਚੰਗੀ ਗੇਂਦਬਾਜ਼ੀ ਦੀ ਨੁਮਾਇਸ਼ ਤੋਂ ਬਾਅਦ ਕਪਤਾਨ ਕੇਨ ਵਿਲੀਅਮਸਨ ਦੇ ਨਾਬਾਦ ਸੈਂਕੜੇ ਦੀ ਬਦੌਲਤ ਦੱਖਣੀ ਅਫ਼ਰੀਕਾ ਨੂੰ 4 ਵਿਕਟ ਨਾਲ ਹਰਾ ਦਿੱਤਾ ਅਤੇ ਦੱਖਣੀ ਅਫ਼ਰੀਕਾ ਦਾ ਆਖ਼ਰੀ ਚਾਰ ਟੀਮਾਂ ‘ਚ ਥਾਂ ਬਣਾਉਣ ਦਾ ਰਾਹ ਲਗਭਗ ਬੰਦ ਕਰ ਦਿੱਤਾ। ਇਸ ਜਿੱਤ ਦੇ ਨਾਲ ਪਿਛਲੀ ਵਾਰ ਦੀ ਉਪ ਜੇਤੂ ਨਿਊਜ਼ੀਲੈਂਡ ਟੀਮ 5 ਮੈਚਾਂ ਵਿੱਚ 9 ਅੰਕ ਲੈ ਕੇ ਸਿਖਰ ਉੱਤੇ ਪਹੁੰਚ ਗਈ ਹੈ ਜਦੋਂ ਕਿ ਦੱਖਣੀ ਅਫ਼ਰੀਕਾ 6 ਮੈਚਾਂ ਵਿੱਚ 3 ਅੰਕਾਂ ਦੇ ਨਾਲ 10 ਟੀਮਾਂ ਵਿੱਚ 8ਵੇਂ ਸਥਾਨ ਉੱਤੇ ਹੈ।
ਦੱਖਣੀ ਅਫ਼ਰੀਕਾ ਨੂੰ ਵਰਲਡ ਕੱਪ ਸੈਮੀ ਫਾਈਨਲ ਵਿੱਚ ਦਾਖ਼ਲ ਹੋਣ ਦੀ ਮਾਮੂਲੀ ਉਮੀਦਾਂ ਬਰਕਰਾਰ ਰੱਖਣ ਲਈ ਇਹ ਮੈਚ ਹਰ ਹਾਲਤ ਵਿੱਚ ਜਿੱਤਣਾ ਜ਼ਰੂਰੀ ਸੀ। ਦੱਖਣੀ ਅਫ਼ਰੀਕਾ ਦੇ 6 ਵਿਕਟਾਂ ਉੱਤੇ 241 ਦੌੜਾਂ ਦੇ ਜਵਾਬ ਵਿੱਚ ਨਿਊਜ਼ੀਲੈਂਡ ਨੇ 3 ਗੇਂਦ ਬਾਕੀ ਰਹਿੰਦੇ ਟੀਚਾ ਹਾਸਲ ਕਰ ਲਿਆ। ਕੀਵੀ ਕਪਤਾਨ ਕੇਨ ਵਿਲੀਅਮਸਨ ਨੇ ਕਪਤਾਨੀ ਪਾਰੀ ਖੇਡ ਦੇ ਹੋਏ 138 ਗੇਂਦਾਂ ਉੱਤੇ 9 ਚੌਕੀਆਂ ਅਤੇ 6 ਛੱਕੇ ਦੀ ਮਦਦ ਨਾਲ 106 ਦੌੜਾਂ ਬਣਾ ਕੇ ਨਾਬਾਦ ਰਹੇ। ਨਿਊਜ਼ੀਲੈਂਡ ਨੂੰ ਆਖ਼ਰੀ ਓਵਰ ਵਿੱਚ ਜਿੱਤ ਲਈ 8 ਦੌੜਾਂ ਚਾਹੀਦੀਆਂ ਸਨ। ਵਿਲੀਅਮਸਨ ਨੇ ਐਂਡਿਲੇ ਫੈਲੁਕਵਾਓ ਦੀ ਦੂਜੀ ਗੇਂਦ ਉੱਤੇ ਛੱਕਾ ਅਤੇ ਤੀਜੀ ਉੱਤੇ ਚੌਕਾ ਲਗਾ ਕੇ ਟੀਮ ਨੂੰ ਜਿੱਤ ਦਵਾਈ।
ਇਸ ਤੋਂ ਪਹਿਲਾਂ ਉਨ੍ਹਾਂ ਨੇ ਮਾਰਟਿਨ ਗੁਪਟਿਲ ਦੇ ਨਾਲ ਦੂਜੇ ਵਿਕਟ ਲਈ 60 ਅਤੇ ਕੋਲਿਨ ਡੀ ਗਰੈਂਡਹੋਮ ਦੇ ਨਾਲ 6ਵੇਂ ਵਿਕਟ ਲਈ 91 ਦੌੜਾਂ ਜੋੜੀਆਂ। ਗਰੈਂਡਹੋਮ ਨੇ ਕਪਤਾਨ ਦਾ ਬਖ਼ੂਬੀ ਨਾਲ ਸਾਥ ਨਿਭਾਉਂਦੇ ਹੋਏ 47 ਗੇਂਦਾਂ ਵਿੱਚ 5 ਚੌਕੀਆਂ ਅਤੇ 2 ਛੱਕੀਆਂ ਦੀ ਮਦਦ ਨਾਲ 60 ਦੌੜਾਂ ਬਣਾਈਆਂ।
ਸਮੇਂ ਪਹਿਲਾਂ ਗਿੱਲੀ ਆਊਟ ਫ਼ੀਲਡ ਦੇ ਕਾਰਨ ਮੈਚ ਦੇਰ ਤੋਂ ਸ਼ੁਰੂ ਹੋਇਆ ਅਤੇ ਮੈਚ ਘਟਾ ਕੇ 49 ਓਵਰ ਪ੍ਰਤੀ ਟੀਮ ਕਰ ਦਿੱਤਾ ਗਿਆ। ਨਿਊਜ਼ੀਲੈਂਡ ਦੇ ਕਪਤਾਨ ਕੇਨ ਵਿਲੀਅਮਸਨ ਨੇ ਟਾਸ ਜਿੱਤ ਕੇ ਗੇਂਦਬਾਜ਼ੀ ਕਰਨ ਦਾ ਫ਼ੈਸਲਾ ਲਿਆ ਅਤੇ ਉਨ੍ਹਾਂ ਦੇ ਗੇਂਦਬਾਜ਼ਾਂ ਨੇ ਇਸ ਨੂੰ ਕਾਫ਼ੀ ਹੱਦ ਤੱਕ ਠੀਕ ਸਾਬਤ ਕਰ ਵਿਖਾਇਆ। ਹਾਸ਼ਿਮ ਅਮਲਾ ਨੇ 55 ਦੌੜਾਂ ਬਣਾਉਣ ਲਈ 83 ਗੇਂਦਾਂ ਖੇਡੀਆਂ ਪਰ ਰੌਸੀ ਵਾਨ ਡਰ ਡੁਸੇਨ ਨੇ ਚੰਗੀ ਬੱਲੇਬਾਜ਼ੀ ਕਰਦੇ ਹੋਏ ਨਾਬਾਦ 67 ਦੌੜਾਂ ਬਣਾਈਆਂ।
ਪਿਛਲੇ ਵਰਲਡ ਕੱਪ ਦੀ ਉਪ ਜੇਤੂ ਨਿਊਜ਼ੀਲੈਂਡ ਦੇ ਗੇਂਦਬਾਜ਼ਾਂ ਨੇ ਮਦਦਗਾਰ ਵਿਕਟ ਉੱਤੇ ਕਾਫ਼ੀ ਅਨੁਸ਼ਾਸਿਤ ਗੇਂਦਬਾਜ਼ੀ ਦੀ ਨੁਮਾਇਸ਼ ਕੀਤਾ।
