ਆਕਲੈਂਡ, 3 ਮਾਰਚ (ਕੂਕ ਪੰਜਾਬੀ ਸਮਾਚਾਰ) – ਨਿਊਜ਼ੀਲੈਂਡ ਦੇ ਜਿਨ੍ਹਾਂ ਲੋਕਾਂ ਵਿੱਚ ਕੋਵਿਡ-19 ਦੇ ਲੱਛਣ ਹਨ ਜਾਂ ਉਹ ਘਰੇਲੂ ਸੰਪਰਕ ਵਿੱਚ ਹਨ, ਉਹ ਹੁਣ ਸਿਹਤ ਮੰਤਰਾਲੇ ਵੱਲੋਂ ਇੱਕ ਨਵੀਂ ਲਾਂਚ ਕੀਤੀ ਸਾਈਟ ਰਾਹੀਂ ਰੈਪਿਡ ਐਂਟੀਜੇਨ ਟੈੱਸਟ (RAT) ਦਾ ਆਰਡਰ ਕਰ ਸਕਦੇ ਹਨ। ਰੈਪਿਡ ਐਂਟੀਜੇਨ ਟੈੱਸਟ ਦਾ ਆਨਲਾਈਨ ਆਰਡਰ ਕਿਵੇਂ ਦੇਣਾ ਹੈ ਇਸ ਬਾਰੇ ਦੱਸਿਆ ਗਿਆ ਹੈ ਕਿ ਕਿਸੇ ਵੀ ਵਿਅਕਤੀ ਨੂੰ ਟੈੱਸਟ ਕਿੱਟ ਦੀ ਲੋੜ ਹੈ ਤਾਂ ਉਹ ਨਵੀਂ ਵੈੱਬਸਾਈਟ: RequestRats ਰਾਹੀਂ ਆਰਡਰ ਦੇ ਸਕਦਾ ਹੈ। ਲੋਕ ਮੁਫ਼ਤ ਫ਼ੋਨ ਨੰਬਰ: 0800 222 478 ‘ਤੇ ਵਿਕਲਪ 3 ਦੀ ਚੋਣ ਕਰਕੇ ਵੀ ਗੱਲ ਕਰਕੇ ਆਰਡਰ ਕਰ ਸਕਦੇ ਹਨ।
ਇਹ ਵਿਕਲਪ ਉਦੋਂ ਸਾਹਮਣੇ ਆਇਆ ਹੈ ਜਦੋਂ ਸਿਹਤ ਦੇ ਡਾਇਰੈਕਟਰ ਜਨਰਲ ਡਾ. ਐਸ਼ਲੇ ਬਲੂਮਫੀਲਡ ਨੇ ਕਿਹਾ ਕਿ ਪੌਲੀਮੇਰੇਜ਼ ਚੇਨ ਰਿਐਕਸ਼ਨ (PCR) ਟੈਸਟਿੰਗ ਸਮਰੱਥਾ ਪਿਛਲੇ ਹਫ਼ਤੇ ਮੰਗ ਦੇ ਅਨੁਸਾਰ ਨਹੀਂ ਚੱਲ ਰਹੀ ਹੈ। ਗੌਰਤਲਬ ਹੈ ਕਿ ਕੱਲ੍ਹ ਬੁੱਧਵਾਰ ਦੇ 22,152 ਕਮਿਊਨਿਟੀ ਕੇਸਾਂ ਵਿੱਚੋਂ 80% ਤੋਂ ਵੱਧ ਕੇਸ RAT ਟੈੱਸਟ ਦੁਆਰਾ ਸਾਹਮਣੇ ਆਏ ਸਨ।
ਕੋਵਿਡ -19 ਟੈਸਟਿੰਗ ਅਤੇ ਸਪਲਾਈ ਦੇ ਕਾਰਜਕਾਰੀ ਗਰੁੱਪ ਮੈਨੇਜਰ ਜੋ ਪੁਗ ਨੇ ਕਿਹਾ ਕਿ ਇੱਕ ਆਨਲਾਈਨ ਆਰਡਰ ਪ੍ਰਕਿਰਿਆ ਨੂੰ ਆਸਾਨ ਬਣਾਏਗਾ। ਉਨ੍ਹਾਂ ਕਿਹਾ ਕਿ ਆਨਲਾਈਨ ਆਰਡਰ ਦੇਣ ਦੀ ਯੋਗਤਾ ਇਹ ਯਕੀਨੀ ਬਣਾਉਂਦੀ ਹੈ ਕਿ ਜਦੋਂ ਲੋਕ ਉਸ ਨੂੰ ਲੈਣ ਜਾਂਦੇ ਹਨ ਤਾਂ ਪ੍ਰਕਿਰਿਆ ਆਸਾਨ ਹੋ ਜਾਂਦੀ ਹੈ।
