ਵੈਲਿੰਗਟਨ, 8 ਨਵੰਬਰ (ਕੂਕ ਪੰਜਾਬੀ ਸਮਾਚਾਰ) – ਅੱਜ 4 ਵਜੇ ਕੀਤੀ ਪ੍ਰੈੱਸ ਕਾਨਫ਼ਰੰਸ ਵਿੱਚ ਪ੍ਰਧਾਨ ਮੰਤਰੀ ਜੈਸਿੰਡਾ ਆਰਡਰਨ ਨੇ ਕਿਹਾ ਕਿ ਕੈਬਨਿਟ ਨੇ ਫ਼ੈਸਲਾ ਕੀਤਾ ਹੈ ਕਿ, ‘ਆਕਲੈਂਡ ਕੱਲ੍ਹ 9 ਨਵੰਬਰ ਦਿਨ ਮੰਗਲਵਾਰ ਰਾਤ 11.59 ਵਜੇ ਤੋਂ ਅਲਰਟ ਲੈਵਲ 3 ਦੀਆਂ ਪਾਬੰਦੀਆਂ ਦੇ ‘ਪੜਾਅ 2’ ਦੇ ਵਿੱਚ ਚਲਾ ਜਾਏਗਾ। ਇਹ ਆਕਲੈਂਡ ਵਿੱਚ ਦੁਕਾਨਾਂ ਅਤੇ ਜਨਤਕ ਸਹੂਲਤਾਂ ਨੂੰ ਦੁਬਾਰਾ ਖੋਲ੍ਹਣ ਅਤੇ ਘਰ ਤੋਂ ਬਾਹਰੀ ਇਕੱਠਾਂ ਨੂੰ 25 ਲੋਕਾਂ ਤੱਕ ਵਧਾਉਣ ਦੀ ਆਗਿਆ ਦੇਵੇਗਾ ਅਤੇ ਵਾਇਕਾਟੋ ਤੇ ਆਕਲੈਂਡ ਨੂੰ ਇੱਕ ਸਮਾਨ ਲੈਵਲ ‘ਚ ਹੋ ਜਾਣਗੇ। ਕਿਉਂਕਿ ਵਾਇਕਾਟੋ ਪਿਛਲੇ ਮੰਗਲਵਾਰ ਦੀ ਰਾਤ ਤੋਂ ਅਲਰਟ ਲੈਵਲ 3 ਦੀਆਂ ਪਾਬੰਦੀਆਂ ਦੇ ‘ਪੜਾਅ 2’ ਦੇ ਵਿੱਚ ਚੱਲ ਰਿਹਾ ਹੈ। ਜਦੋਂ ਕਿ ਦੇਸ਼ ਦਾ ਬਾਕੀ ਹਿੱਸਾ ਅਲਰਟ ਲੈਵਲ 2 ‘ਤੇ ਹੀ ਹੈ।
ਡਾਇਰੈਕਟਰ ਜਨਰਲ ਆਫ਼ ਹੈਲਥ ਡਾ. ਐਸ਼ਲੇ ਬਲੂਮਫੀਲਡ ਨੇ ਕਿਹਾ ਕਿ ਇਸ ਦੇ ਨਾਲ ਹੀ ਅੱਪਰ ਨੌਰਥਲੈਂਡ 11 ਨਵੰਬਰ ਦਿਨ ਵੀਰਵਾਰ ਰਾਤ 11.59 ਵਜੇ ਤੋਂ ਅਲਰਟ ਲੈਵਲ 2 ਉੱਤੇ ਚਲਾ ਜਾਏਗਾ।
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਰਿਟੇਲ ਕਾਰੋਬਾਰ ਖੁੱਲ੍ਹ ਜਾਣਗੇ ਅਤੇ ਲਾਇਬ੍ਰੇਰੀਆਂ ਅਤੇ ਚਿੜੀਆਘਰ ਵਰਗੀਆਂ ਜਨਤਕ ਸਹੂਲਤਾਂ ਖੁੱਲ੍ਹ ਸਕਦੀਆਂ ਹਨ, ਪਰ ਜਿੰਮ ਅਤੇ ਮੂਵੀ ਥੀਏਟਰ ਅਜੇ ਵੀ ਬੰਦ ਰਹਿਣਗੇ। ਉਨ੍ਹਾਂ ਕਿਹਾ 25 ਲੋਕਾਂ ਦਾ ਸਮੂਹ ਦੋ ਘਰੇਲੂ ਨਿਯਮਾਂ ਤੋਂ ਬਿਨਾਂ ਬਾਹਰ ਇਕੱਠੇ ਹੋ ਸਕਦੇ ਹਨ। ਆਰਡਰਨ ਨੇ ਕਿਹਾ ਕਿ ਇਸ ਫ਼ੈਸਲੇ ਦੇ ਪਿੱਛੇ ਦਾ ਕਾਰਣ ਅੰਸ਼ਿਕ ਤੌਰ ‘ਤੇ ਆਕਲੈਂਡ ਵਿੱਚ ਟੀਕਾਕਰਣ ਦਾ ਪੱਧਰ ਸੀ, ਜਿਸ ਨੇ ਹਫ਼ਤੇ ਦੇ ਅੰਤ ਵਿੱਚ ਟੀਕੇ ਦੀ ਪਹਿਲੀ ਖ਼ੁਰਾਕ ਨੂੰ 90% ਤੱਕ ਪਹੁੰਚਾ ਦਿੱਤਾ।
ਪ੍ਰਧਾਨ ਮੰਤਰੀ ਆਰਡਰਨ ਨੇ ਕਿਹਾ ਕਿ ਉਹ 10 ਨਵੰਬਰ ਦਿਨ ਬੁੱਧਵਾਰ ਨੂੰ ਆਕਲੈਂਡ ਵਿੱਚ ਕਾਰੋਬਾਰੀ ਅਤੇ ਲੋਕਲ ਗਵਰਮੈਂਟ ਦੇ ਨੁਮਾਇੰਦਿਆਂ ਨਾਲ ਮੁਲਾਕਾਤ ਕਰੇਗੀ। ਉਨ੍ਹਾਂ ਨੇ ਕਿਹਾ ਕਿ ਸਬੂਤ ਦਰਸਾਉਂਦੇ ਹਨ ਕਿ ਬਾਹਰ ਪਿਕਨਿਕ ਕਰਨ ਨਾਲ ਕੇਸਾਂ ਵਿੱਚ ਵਾਧਾ ਨਹੀਂ ਹੁੰਦਾ, ਉਨ੍ਹਾਂ ਨੇ ਕਿਹਾ ਸਿਰਫ਼ ਇੱਕ ਕੇਸ ਬਾਹਰੀ ਬਾਰਬਿਕਯੂ ਨਾਲ ਜੁੜਿਆ ਹੋਇਆ ਹੈ। ਕੰਮ ਦੇ ਸਥਾਨਾਂ ‘ਤੇ ਮਹੱਤਵਪੂਰਨ ਕੇਸਾਂ ਦੀ ਗਿਣਤੀ ਨਹੀਂ ਵੇਖੀ ਗਈ ਸੀ, ਜੋ ਦੱਸਿਆ ਹੈ ਕਿ ਰਿਟੇਲ ਕਾਰੋਬਾਰ ਕਿਉਂ ਖੋਲ੍ਹਿਆ ਜਾ ਸਕਦਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਫ਼ੈਸਲੇ ਨੇ ਕਾਰੋਬਾਰਾਂ ‘ਤੇ ਪ੍ਰਭਾਵ ਅਤੇ ਆਕਲੈਂਡਰਸ ਦੁਆਰਾ ਲਏ ਗਏ ਮਾਨਸਿਕ/ਭਾਵਨਾਤਮਕ ਟੋਲ ਨੂੰ ਵੀ ਸਵੀਕਾਰ ਕੀਤਾ।
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਟੀਕਾਕਰਣ ਦੇ ਉੱਚ ਪੱਧਰਾਂ ਕਾਰਣ 29 ਨਵੰਬਰ ਨੂੰ ਕੈਬਨਿਟ ਦੇ ਫ਼ੈਸਲੇ ਦੁਆਰਾ ਆਕਲੈਂਡ ਟਰੈਫ਼ਿਕ ਲਾਈਟ ਪ੍ਰਣਾਲੀ ਵਿੱਚ ਆ ਜਾਣ ਦੀ ਤੱਕੜੀ ਉਮੀਦ ਹੈ, ਅਨੁਮਾਨ ਦਰਸਾਉਂਦੇ ਹਨ ਕਿ ਕੇਸ ਵਧਣਗੇ ਪਰ ਇਹ ਸਿਰਫ਼ ਵਿਚਾਰ ਨਹੀਂ ਹੈ। ਹਸਪਤਾਲ ਵਿੱਚ ਭਰਤੀ ਹੋਣ ਵਾਲਿਆਂ ‘ਤੇ ਵੀ ਵਿਚਾਰ ਕੀਤਾ ਗਿਆ ਅਤੇ ਇਸ ਸਮੇਂ ਉਮੀਦ ਨਾਲੋਂ ਘੱਟ ਮੰਨਿਆ ਜਾ ਰਿਹਾ ਹੈ। ਕੈਬਨਿਟ ਅਗਲੇ ਹਫ਼ਤੇ ਵਾਇਕਾਟੋ ਦੇ ਅਲਰਟ ਲੈਵਲ ‘ਤੇ ਮੀਟਿੰਗ ਕਰੇਗਾ।
ਪ੍ਰਧਾਨ ਮੰਤਰੀ ਜੈਸਿੰਡਾ ਆਰਡਰਨ ਨੇ ਕਿਹਾ ਹੈ ਕਿ ਆਕਲੈਂਡ ਵਾਸੀਆਂ ਨੂੰ ਕ੍ਰਿਸਮਿਸ ਅਤੇ ਗਰਮੀਆਂ ਵਿੱਚ ਆਉਣ-ਜਾਣ ਦੀ ਇਜਾਜ਼ਤ ਦਿੱਤੀ ਜਾਵੇਗੀ, ਸਰਕਾਰ ਵਰਤਮਾਨ ਵਿੱਚ ਇਸ ਦੀਆਂ ਲੌਜਿਸਟਿਕ ਚੁਣੌਤੀਆਂ ਵਿੱਚੋਂ ਲੰਘ ਰਹੀ ਹੈ। ਆਕਲੈਂਡ ਦੀ ਸਰਹੱਦ ਮੁੜ ਖੋਲ੍ਹਣ ਦੀ ਮਿਤੀ ਅਗਲੇ ਹਫ਼ਤੇ ਐਲਾਨੇ ਜਾਣ ਦੀ ਉਮੀਦ ਹੈ। ਵੈਕਸੀਨ ਪਾਸਪੋਰਟਾਂ ਦਾ ਹੁਣ ਟ੍ਰਾਇਲ ਕੀਤਾ ਜਾ ਰਿਹਾ ਹੈ ਅਤੇ ਮਹੀਨੇ ਦੇ ਅੰਤ ਤੱਕ ਤਿਆਰ ਹੋਣ ਦੇ ਰਾਹ ‘ਤੇ ਹੈ।
ਅਲਰਟ ਲੈਵਲ 3 ਦੀਆਂ ਪਾਬੰਦੀਆਂ ਦੇ ‘ਪੜਾਅ 2’ ਦੇ ਵਿੱਚ:
- ਰਿਟੇਲ ਕਾਰੋਬਾਰ ਦਾ ਸੰਚਾਲਨ ਕਰ ਸਕਦੇ ਹਨ, ਗ੍ਰਾਹਕ ਕਾਰੋਬਾਰ ਵਾਲੇ ਸਥਾਨ ‘ਚ ਦਾਖਲ ਹੋ ਸਕਦੇ ਹਨ। ਉਹ ਆਪਣੇ ਚਿਹਰੇ ਨੂੰ ਢੱਕਣ ਦੇ ਨਾ-ਨਾਲ 2 ਮੀਟਰ ਦੀ ਸਰੀਰਕ ਦੂਰੀ ਰੱਖਣੀ ਲਾਜ਼ਮੀ ਹੋਵੇਗੀ। ਯਾਨੀ ਕੇ ਦੂਜੇ ਪੜਾਅ ‘ਚ ਰਿਟੇਲ ਕਾਰੋਬਾਰ ਖੁੱਲ੍ਹ ਸਕਦੇ ਹਨ, ਗਾਹਕਾਂ ਨੂੰ ਦੋ ਮੀਟਰ ਦੀ ਦੂਰੀ ਰੱਖਣ ਅਤੇ ਸਟਾਫ਼ ਤੇ ਗਾਹਕਾਂ ਨੂੰ ਚਿਹਰੇ ਨੂੰ ਢੱਕਣ ਦੀ ਲੋੜ ਹੈ।
- ਜਨਤਕ ਸਹੂਲਤਾਂ ਜਿਵੇਂ ਕਿ ਲਾਇਬ੍ਰੇਰੀਆਂ ਅਤੇ ਅਜਾਇਬ ਘਰ ਮੁੜ ਖੁੱਲ੍ਹ ਸਕਦੇ ਹਨ, ਪਰ ਚਿਹਰੇ ਨੂੰ ਢੱਕਣ ਅਤੇ 2 ਮੀਟਰ ਸਰੀਰਕ ਦੂਰੀ ਦੀ ਲੋੜ ਦੇ ਨਾਲ ਹੀ ਖੁੱਲ੍ਹਣਗੇ। ਪਰ ਜਿੰਮ ਅਤੇ ਮੂਵੀ ਥੀਏਟਰ ਅਜੇ ਵੀ ਬੰਦ ਰਹਿਣਗੇ।
- ਆਊਟਡੋਰ ਇਕੱਠ 25 ਲੋਕਾਂ ਤੱਕ ਹੋ ਸਕਦੇ ਹਨ।
