ਵੈਲਿੰਗਟਨ, 12 ਨਵੰਬਰ (ਕੂਕ ਪੰਜਾਬੀ ਸਮਾਚਾਰ) – ਨਿਊਜ਼ੀਲੈਂਡ ‘ਚ ਕੋਵਿਡ -19 ਦੇ ਡੈਲਟਾ ਪ੍ਰਕੋਪ ਦੇ ਕਮਿਊਨਿਟੀ ਨਾਲ ਸੰਬੰਧਿਤ ਅੱਜ 201 ਹੋਰ ਨਵੇਂ ਕੇਸ ਸਾਹਮਣੇ ਆਏ ਹਨ ਅਤੇ ਤਾਰਾਨਾਕੀ ਵਿੱਚ ਵਾਇਰਸ ਦੇ ਮਿਲਣ ਦੀ ਪੁਸ਼ਟੀ ਹੋਈ ਹੈ। ਟਾਪੋ ਵਿਖੇ ਵੇਸਟਵਾਟਰ ਦਾ ਕੀਤਾ ਗਿਆ ਟੈੱਸਟ ਪਾਜ਼ੇਟਿਵ ਰਿਹਾ ਹੈ। ਉਪ ਪ੍ਰਧਾਨ ਮੰਤਰੀ ਗ੍ਰਾਂਟ ਰੌਬਰਟਸਨ ਅਤੇ ਪਬਲਿਕ ਹੈਲਥ ਦੇ ਡਾਇਰੈਕਟਰ ਡਾਕਟਰ ਕੈਰੋਲਿਨ ਮੈਕਲਨੇ ਨੇ ਅੱਜ ਦੁਪਹਿਰ ਨੂੰ ਪ੍ਰੈੱਸ ਕਾਨਫ਼ਰੰਸ ਵਿੱਚ ਅੱਪਡੇਟ ਦਿੱਤੀ।
ਡਾਇਰੈਕਟਰ ਆਫ਼ ਪਬਲਿਕ ਹੈਲਥ ਕੈਰੋਲਿਨ ਮੈਕਲਨੇ ਨੇ ਜਾਣਕਾਰੀ ਸਾਂਝੀ ਕਰਦੇ ਹੋਏ ਦੱਸਿਆ ਕਿ ਅੱਜ ਦੇ ਇਨ੍ਹਾਂ ਨਵੇਂ 201 ਕੇਸਾਂ ‘ਚ ਆਕਲੈਂਡ ‘ਚੋਂ 181 ਕੇਸ, ਵਾਇਕਾਟੋ ‘ਚੋਂ 15 ਕੇਸ, ਨੌਰਥਲੈਂਡ ‘ਚੋਂ 4 ਕੇਸ ਅਤੇ 1 ਕੇਸ ਤਾਰਾਨਾਕੀ ਵਿੱਚ ਆਇਆ ਹੈ। ਅੱਜ ਦੇ ਬਹੁਤੇ ਕੇਸ (104) ਮੌਜੂਦਾ ਕੇਸਾਂ ਨਾਲ ਜੁੜੇ ਹੋਏ ਹਨ, ਜਿਨ੍ਹਾਂ ਵਿੱਚੋਂ 84 ਨੂੰ ਅਜੇ ਜੋੜਿਆ ਜਾਣਾ ਬਾਕੀ ਹੈ।
ਉਨ੍ਹਾਂ ਨੇ ਕਿਹਾ ਕਿ ਪਿਛਲੀ ਰਾਤ ਐਲਾਨੇ ਗਏ 5 ਕੇਸਾਂ ਨੂੰ ਕੱਲ੍ਹ ਦੇ ਐਲਾਨ ਵਿੱਚ ਸ਼ਾਮਲ ਕੀਤਾ ਜਾਵੇਗਾ। ਕੇਸਾਂ ਨਾਲ ਸਬੰਧਿਤ ਦਿਲਚਸਪੀ ਦੇ ਪੰਜ ਨਵੇਂ ਸਥਾਨ ਜਾਰੀ ਕੀਤੇ ਗਏ ਹਨ ਅਤੇ ਸਿਹਤ ਟੀਮਾਂ ਹੋਰਾਂ ਦੀ ਪਛਾਣ ਕਰਨ ਲਈ ਉਨ੍ਹਾਂ ਉੱਤੇ ਕੰਮ ਕਰ ਰਹੀ ਹੈ। ਹੁਣ ਤੱਕ ਕੇਸਾਂ ਦੇ ਪੰਜ ਨਜ਼ਦੀਕੀ ਸੰਪਰਕਾਂ ਦੀ ਪਛਾਣ ਕੀਤੀ ਗਈ ਹੈ। ਅੱਜ ਇੱਕ ਮੈਨੇਜ਼ਡ ਆਈਸੋਲੇਸ਼ਨ ਸਹੂਲਤ ਵਿੱਚ ਵਾਪਸ ਆਉਣ ਵਾਲੇ ਵਿਅਕਤੀ ਦਾ ਇੱਕ ਨਵਾਂ ਕੇਸ ਵੀ ਹੈ।
ਮੈਕਲਨੇ ਨੇ ਕੋਵਿਡ ਦੇ ਨਾਲ ਕਮਿਊਨਿਟੀ ਵਿੱਚ ਦੇਖਭਾਲ ਦੀ ਮੰਗ ਕਰਨ ਵਾਲੇ ਕਿਸੇ ਵੀ ਵਿਅਕਤੀ ਨੂੰ ਕਿਸੇ ਵੀ ਸਮੇਂ ਡਾਕਟਰੀ ਸਹਾਇਤਾ ਦੀ ਲੋੜ ਪੈਣ ‘ਤੇ ਪਹੁੰਚਣ ਦੀ ਅਪੀਲ ਕੀਤੀ।
ਅੱਜ ਦੇ ਨਵੇਂ ਕੇਸਾਂ ਨਾਲ ਡੈਲਟਾ ਪ੍ਰਕੋਪ ਦੇ ਕੇਸਾਂ ਦੀ ਗਿਣਤੀ ਹੁਣ ਵਧ ਕੇ 5,196 ਹੋ ਗਈ ਹੈ। ਇਨ੍ਹਾਂ ਵਿੱਚੋਂ 4,916 ਆਕਲੈਂਡ ‘ਚ ਹਨ, ਵਾਇਕਾਟੋ ‘ਚ 218, ਵੈਲਿੰਗਟਨ ‘ਚ 17 (ਜਿਨ੍ਹਾਂ ਵਿੱਚੋਂ ਸਾਰੇ ਠੀਕ ਹੋ ਗਏ ਹਨ), ਨੌਰਥਲੈਂਡ ‘ਚ 39, 1 ਨੈਲਸਨ/ਮਾਰਲਬਰੋ ‘ਚ, 4 ਕੈਂਟਰਬਰੀ ‘ਚ ਅਤੇ 1 (5 ਹੋਰਾਂ ਦੇ ਨਾਲ ਅਜੇ ਵੀ ਅਧਿਕਾਰਤ ਗਿਣਤੀ ਵਿੱਚ ਸ਼ਾਮਲ ਕੀਤਾ ਜਾਣਾ ਹੈ) ਤਾਰਾਨਾਕੀ ‘ਚ ਹਨ।
ਇਸ ਵੇਲੇ ਹਸਪਤਾਲ ਵਿੱਚ 85 ਮਰੀਜ਼ ਹਨ, ਜਿਨ੍ਹਾਂ ਵਿੱਚੋਂ 11 ਕੇਸ ਸਖ਼ਤ ਦੇਖਭਾਲ (ICU/HDU) ਵਿੱਚ ਹਨ। ਇਨ੍ਹਾਂ ਵਿੱਚੋਂ ਤਾਰਾਨਾਕੀ ਬੇਸ ਹਸਪਤਾਲ ਵਿੱਚ 1 ਵਿਅਕਤੀ ਦਾਖ਼ਲ ਹੈ। ਕੋਵਿਡ -19 ਨਾਲ ਹਸਪਤਾਲਾਂ ਵਿੱਚ ਇਸ ਵੇਲੇ ਦਾਖ਼ਲ ਲੋਕਾਂ ਦੀ ਔਸਤ ਉਮਰ 53 ਸਾਲ ਹੈ। ਅੱਜ ਦੇ ਇਨ੍ਹਾਂ 201 ਕੇਸਾਂ ਵਿੱਚੋਂ 92 ਕੇਸ ਮਹਾਂਮਾਰੀ ਵਿਗਿਆਨ ਨਾਲ ਲਿੰਕ ਹਨ, ਜਦੋਂ ਕਿ 109 ਕੇਸ ਨੂੰ ਮੌਜੂਦਾ ਕੇਸਾਂ ਨਾਲ ਜੋੜਿਆ ਜਾਣਾ ਬਾਕੀ ਹੈ। ਪਿਛਲੇ 14 ਦਿਨਾਂ ਤੋਂ 755 ਕੇਸ ਅਣਲਿੰਕ ਹਨ।
ਆਕਲੈਂਡ ਵਿੱਚ 2,998 ਲੋਕ ਘਰਾਂ ਵਿੱਚ ਆਈਸੋਲੇਟ ਹਨ, ਜਿਸ ਵਿੱਚ 929 ਘਰਾਂ ਵਿੱਚ ਵਾਇਰਸ ਵਾਲੇ 1382 ਕੇਸ ਸ਼ਾਮਲ ਹਨ।
