ਗੁਰਦਾਸਪੁਰ, 27 ਜੁਲਾਈ – ਖ਼ਬਰ ਹੈ ਕਿ ਪੰਜਾਬ ਦੇ ਗੁਰਦਾਸਪੁਰ ਦੀਨਾਨਗਰ ਪੁਲਿਸ ਥਾਣੇ ਅਤੇ ਇੱਕ ਸਰਕਾਰੀ ਬੱਸ ਉੱਤੇ ਅੱਜ ਸਵੇਰੇ ਅਤਿਵਾਦੀ ਹਮਲਾ ਹੋਇਆ। ਇਸ ਹਮਲੇ ਵਿੱਚ ਦੋ ਪੁਲਸ ਕਰਮੀ ਸਣੇ 8 ਲੋਕਾਂ ਦੇ ਮਾਰੇ ਜਾਣ ਦੀ ਖ਼ਬਰ ਹੈ, ਇਸ ਦੇ ਇਲਾਵਾ ਕਈ ਲੋਕ ਜ਼ਖ਼ਮੀ ਦੱਸੇ ਜਾ ਰਹੇ ਹਨ। ਖ਼ਬਰ ਹੈ ਕਿ ਇੱਕ ਦਰਜਨ ਤੋਂ ਜ਼ਿਆਦਾ ਅਤਿਵਾਦੀ ਥਾਣੇ ਵਿੱਚ ਘੁੱਸੇ ਅਤੇ ਉਨ੍ਹਾਂ ਨੇ ਗੋਲੀ ਚਲਾਉਂਦੇ ਹੋਏ ਥਾਣੇ ‘ਤੇ ਕਬਜ਼ਾ ਕਰ ਲਿਆ। ਥਾਣੇ ਦੇ ਅੰਦਰ ਅਤਿਵਾਦੀ ਹੁਣੇ ਵੀ ਮੌਜੂਦ ਹਨ ਅਤੇ ਮੁੱਠਭੇੜ ਜਾਰੀ ਹੈ, ਸੁਰੱਖਿਆ ਜਵਾਨਾਂ ਨੇ ਥਾਣੇ ਨੂੰ ਘੇਰ ਲਿਆ ਹੈ ਅਤੇ ਹਮਲਾਵਰਾਂ ‘ਤੇ ਕਾਰਵਾਈ ਕੀਤੀ ਜਾ ਰਹੀ ਹੈ। ਫਾਇਰਿੰਗ ਦੀਆਂ ਆਵਾਜ਼ਾਂ ਲਗਾਤਾਰ ਆ ਰਹੀਆਂ ਹਨ, ਦੱਸਿਆ ਜਾ ਰਿਹਾ ਹੈ ਕਿ ਹਮਲਾਵਰਾਂ ਕੋਲ ਭਾਰੀ ਗਿਣਤੀ ‘ਚ ਹਥਿਆਰ ਮੌਜੂਦ ਹਨ। ਉੱਥੇ ਹੀ ਦੀਨਾਨਗਰ-ਪਠਾਨਕੋਟ ਰੇਲਵੇ ਟਰੈਕ ਉੱਤੇ ਪੰਜ ਬੰਬ ਵੀ ਮਿਲੇ ਹਨ ।
ਗ੍ਰਹਿ ਮੰਤਰਾਲਾ ਵੱਲੋਂ ਅਤਿਵਾਦੀ ਹਮਲਾ ਹੋਣ ਦੀ ਪੁਸ਼ਟੀ ਕੀਤੀ ਹੈ। ਗ੍ਰਹਿ ਮੰਤਰੀ ਰਾਜਨਾਥ ਸਿੰਘ ਨੇ ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨਾਲ ਗੱਲ ਕੀਤੀ ਹੈ। ਗ੍ਰਹਿ ਮੰਤਰੀ ਰਾਜਨਾਥ ਸਿੰਘ ਨੇ ਕਿਹਾ ਹੈ ਕਿ ਅਸੀਂ ਗੁਰਦਾਸਪੁਰ ਅਤੇ ਪੰਜਾਬ ਦੀ ਹਾਲਤ ਉੱਤੇ ਨਜ਼ਰ ਰੱਖੀ ਹੋਈ ਹੈ ਤੇ ਛੇਤੀ ਹੀ ਹਾਲਤ ਉੱਤੇ ਕਾਬੂ ਕਰ ਲਿਆ ਜਾਵੇਗਾ।
