ਆਕਲੈਂਡ, 13 ਜੁਲਾਈ (ਹਰਰਜਿੰਦਰ ਸਿੰਘ ਬਸਿਆਲਾ) – ਕਹਿੰਦੇ ਨੇ ਜੇਕਰ ਖੇਡਣ ਅਤੇ ਖਿਡਾਉਣ ਦੀ ਭਾਵਨਾ ਵਧੀਆ ਹੋਵੇ ਤਾਂ ਖੇਡਾਂ ਦਾ ਮਿਆਰ ਅੰਤਰਰਾਸ਼ਟਰੀ ਹੋਣ ਤੋਂ ਵੀ ਅੱਗੇ ਵਧ ਜਾਂਦਾ ਹੈ। ਨਿਊਜ਼ੀਲੈਂਡ ਦੇ ਵਿਚ ਪੰਜਾਬੀਆਂ ਦੀ ਮਾਂ ਖੇਡ ਕਬੱਡੀ ਨੂੰ ਪ੍ਰਫੁੱਲਤ ਕਰਨ ਦੇ ਲਈ ਜਿੱਥੇ ਖੇਡ ਕਲੱਬਾਂ ਦਾ ਵੱਡਾ ਯੋਗਦਾਨ ਹੈ ਉਥੇ ਇਨ੍ਹਾਂ ਨੂੰ ਇਕ ਮਾਲਾ ਵਿਚ ਪਰੋਈ ਰੱਖਣਾ ਅਤੇ ਖੇਡ ਨਿਯਮਾਵਲੀ ਅਧੀਨ ਕਬੱਡੀ ਟੂਰਨਾਮੈਂਟ ਕਰਵਾ ਕੇ ਬਰਾਬਰਤਾ ਕਾਇਮ ਰੱਖਣੀ ‘ਨਿਊਜ਼ੀਲੈਂਡ ਕਬੱਡੀ ਫੈਡਰੇਸ਼ਨ’ ਦੇ ਹਿੱਸੇ ਕਈ ਸਾਲਾਂ ਤੋਂ ਆ ਰਿਹਾ ਹੈ। ਅੱਜ ‘ਨਿਊਜ਼ੀਲੈਂਡ ਕਬੱਡੀ ਫੈਡਰੇਸ਼ਨ’ ਦੇ ਸਲਾਨਾ ਇਜਲਾਸ ਦੇ ਵਿਚ ਸਰਬ ਸੰਮਤੀ ਦੇ ਨਾਲ ਸ. ਤੀਰਥ ਸਿੰਘ ਅਟਵਾਲ ਨੂੰ ਸਾਲ 2023-24 ਦੇ ਲਈ ਸਰਬ ਸੰਮਤੀ ਦੇ ਨਾਲ ਪ੍ਰਧਾਨ ਚੁਣਿਆ ਗਿਆ। ਉਪ ਪ੍ਰਧਾਨ ਸ. ਜਗਦੇਵ ਸਿੰਘ ਜੱਗੀ ਰਾਮੂਵਾਲੀਆਂ ਨੂੰ ਚੁਣਿਆ ਗਿਆ। ਚੇਅਰਮੈਨ ਦੀ ਸੇਵਾ ਬਿੱਲਾ ਦੁਸਾਂਝ ਨੂੰ ਸੌਂਪੀ ਗਈ। ਬਾਕੀ ਹੋਰ ਨਿਯੁਕਤੀਆਂ ਕਰਦਿਆਂ ਸਕੱਤਰ ਸ. ਵਰਿੰਦਰ ਸਿੱਧੂ, ਸਹਾਇਕ ਸਕੱਤਰ ਸ. ਅਵਤਾਰ ਸਿੰਘ ਤਾਰੀ, ਮੀਡੀਆ ਤਾਲਮੇਲ ਸ. ਹਰਪ੍ਰੀਤ ਸਿੰਘ ਰਾਏਸਰ ਬਣਾਏ ਗਏ, ਫੈਡਰੇਸ਼ਨ ਬੁਲਾਰੇ ਦੀ ਸੇਵਾ ਰਾਣਾ ਹਰਸਿਮਰਤਜੀਤ ਪਾਲ ਸਿੰਘ (ਹੈਰੀ ਰਾਣਾ) ਨੂੰ ਸੌਂਪੀ ਗਈ। ਕਾਰਜਕਾਰੀ ਮੈਂਬਰਾਂ ਵਿਚ ਪਿ੍ਰਥਪਾਲ ਗਰੇਵਾਲ, ਤਲਵਿੰਦਰ ਸੋਹਲ, ਹੈਪੀ ਹੀਰਾ, ਲੱਖਾ ਧਾਲੀਵਾਲ. ਸਤਨਾਮ ਸਿੰਘ ਕਾਲਾ ਸ਼ਾਮਿਲ ਹਨ।
ਵਰਨਣਯੋਗ ਹੈ ਕਿ ‘ਨਿਊਜ਼ੀਲੈਂਡ ਕਬੱਡੀ ਫੈਡਰੇਸ਼ਨ’ ਵੱਲੋਂ ਨਿਊਜ਼ੀਲੈਂਡ ਦੇ ਹਰ ਪ੍ਰਮੁੱਖ ਸ਼ਹਿਰ ’ਚ ਕਬੱਡੀ ਮੈਚ ਕਰਵਾਏ ਜਾ ਚੁੱਕੇ ਹਨ ਅਤੇ ਇਕ ਅੰਦਾਜ਼ੇ ਮੁਤਾਬਿਕ 50 ਦੇ ਕਰੀਬ ਟੂਰਨਾਮੈਂਟ ਕਰਵਾਏ ਜਾ ਚੁੱਕੇ ਹਨ। ਨਿਊਜ਼ੀਲੈਂਡ ਸਿੱਖ ਖੇਡਾਂ ਦੀ ਸ਼ੁਰੂਆਤ ਤੋਂ ਲੈ ਕੇ ਇਸ ਵਾਰ 25 ਤੇ 26 ਨਵੰਬਰ ਨੂੰ ਹੋ ਰਹੀਆਂ ਪੰਜਵੀਆਂ ਨਿਊਜ਼ੀਲੈਂਡ ਸਿੱਖ ਖੇਡਾਂ ਦੇ ਵਿਚ ਵੀ ਅਹਿਮ ਯੋਗਦਾਨ ਰਹੇਗਾ।
ਫੈਡਰੇਸ਼ਨ ਵੱਲੋਂ ਕਬੱਡੀ ਖਿਡਾਰੀ ਲਈ ਇਕ ਲੱਖ ਦੀ ਮਦਦ ਦਾ ਐਲਾਨ
‘ਨਿਊਜ਼ੀਲੈਂਡ ਕਬੱਡੀ ਫੈਡਰੇਸ਼ਨ’ ਦੀ ਅੱਜ ਦੀ ਮੀਟਿੰਗ ਦੇ ਵਿਚ ਪਹਿਲਾ ਪਰਉਪਕਾਰੀ ਕਾਰਜ ਕਰਦਿਆਂ ਫੈਸਲਾ ਲਿਆ ਗਿਆ ਕਿ ਪ੍ਰਸਿੱਧ ਕਬੱਡੀ ਖਿਡਾਰੀ ਵੀਰੀ ਢੈਪਈ ਜਿਸ ਦੀ ਇਕ ਸੜਕ ਦੁਰਘਟਨਾ ਬਾਅਦ ਡਾਕਟਰੀ ਕਾਰਨ ਕਰਕੇ ਇਕ ਲੱਤ ਕੱਟਣੀ ਪਈ ਸੀ, ਦੀ ਵਿੱਚੀ ਸਹਾਇਤਾ ਵਾਸਤੇ ਇਕ ਲੱਖ ਰੁਪਈਆ ਦਿੱਤਾ ਜਾਵੇਗਾ। ਇਸਦੇ ਨਾਲ ਹੀ ਪੰਜਾਬ ਦੇ ਵਿਚ ਹੜ੍ਹਾਂ ਦੀ ਮਾਰ ਹੇਠ ਆਏ ਪੀੜਤ ਪਰਿਵਾਰਾਂ ਦੀ ਵੀ ਮਦਦ ਕੀਤੀ ਜਾਵੇਗੀ।
ਵਧਾਈਆਂ: ਨਿਊਜ਼ੀਲੈਂਡ ਸਿੱਖ ਗੇਮਜ਼ ਕਮੇਟੀ ਵੱਲੋਂ ਵੀ ਸ. ਤੀਰਥ ਸਿੰਘ ਅਟਵਾਲ ਨੂੰ ਪ੍ਰਧਾਨ ਦੀ ਸੇਵਾ ਮਿਲਣ ਉਤੇ ਅਤੇ ਬਾਕੀ ਅਹੁਦੇਦਾਰਾਂ ਨੂੰ ਹੋਰ ਜ਼ਿੰਮੇਵਾਰੀਆਂ ਮਿਲਣ ਉਤੇ ਬਹੁਤ ਬਹੁਤ ਵਧਾਈ ਦਿੱਤੀ ਹੈ ਅਤੇ ਖੇਡਾਂ ਦੇ ਵਿਚ ਭਰਪੂਰ ਸਹਿਯੋਗ ਦੀ ਆਸ ਪ੍ਰਗਟ ਕੀਤੀ ਗਈ ਹੈ।
ਵਧਾਈਆਂ: ਖੇਡ ਕਲੱਬਾਂ ਵੱਲੋ: ਨਿਊਜ਼ੀਲੈਂਡ ਕਬੱਡੀ ਫੈਡਰੇਸ਼ਨ ਦੇ ਨਾਲ ਜੁੜੀਆਂ ਸਮੁੱਚੀਆਂ ਖੇਡ ਕਲੱਬਾਂ ਵੱਲੋਂ ਵੀ ਸ. ਤੀਰਥ ਸਿੰਘ ਅਟਵਾਲ ਨੂੰ ਪ੍ਰਧਾਨ ਦੀ ਜ਼ਿੰਮੇਵਾਰੀ ਮਿਲਣ ਉਤੇ ਵਧਾਈ ਦਿੱਤੀ ਗਈ ਹੈ। ਕਬੱਲਾਂ ਦਾ ਮੰਨਣਾ ਹੈ ਕਿ ਇਹ ਫੈਡਰੇਸ਼ਨ ਖੇਡ ਭਾਵਨਾ ਦੇ ਅਧਾਰ ਉਤੇ ਰਿਸ਼ਤੇ ਬਣਾਈ ਰੱਖਣ ਦੇ ਵਿਚ ਅਹਿਮ ਭੂਮਿਕਾ ਨਿਭਾਅ ਰਹੀ ਹੈ।
ਵਧਾਈਆਂ: ਮੀਡੀਆ ਅਦਾਰੇ: ਪੰਜਾਬੀ ਮੀਡੀਆ ‘ਪੰਜਾਬੀ ਹੈਰਲਡ’, ‘ਰੇਡੀਓ ਸਪਾਈ’, ‘ਡੇਲੀ ਖਬਰ’,‘ਕੂਕ ਪੰਜਾਬੀ ਸਮਾਚਾਰ’ ਨੇ ਵਧਾਈ ਦਿੱਤੀ ਹੈ।
