ਹੈਮਿਲਟਨ, 17 ਦਸੰਬਰ – ਹੈਮਿਲਟਨ ਵਿੱਚ ਅੱਜ ਸਵੇਰੇ ਇੱਕ ਨੌਜਵਾਨ ਡੇਅਰੀ ਵਰਕਰ, ਜੋ ਜਲਦੀ ਹੀ ਨਵਾਂ ਪਿਤਾ ਬਣਨ ਵਾਲਾ ਹੈ, ਦੀਆਂ ਦੋ ਉਂਗਲਾਂ ਹਥਿਆਰ ਨਾਲ ਲੈਸ ਲੁਟੇਰਿਆਂ ਨੇ ਹਮਲਾ ਕਰਕੇ ਕੱਟ ਦਿੱਤੀਆਂ।
ਖ਼ਬਰ ਮੁਤਾਬਿਕ ਪੁਲਿਸ ਅਤੇ ਐਂਬੂਲੈਂਸ ਨੇ ਅੱਜ ਸਵੇਰੇ 7.30 ਵਜੇ ਇਰਵਿਨ ਸੇਂਟ ਡੇਅਰੀ ਫਰੈਂਕਟਨ ਵਿਖੇ ਇੱਕ ਭਿਆਨਕ ਲੁੱਟ ਦੀ ਰਿਪੋਰਟ ਬਾਰੇ ਦੱਸਿਆ। ਪੁਲਿਸ ਦੇ ਬੁਲਾਰੇ ਨੇ ਦੱਸਿਆ ਕਿ ਫਰੈਂਕਟਨ ਦੇ ਇਰਵਿਨ ਸੇਂਟ ‘ਤੇ ਵਪਾਰਕ ਇਮਾਰਤ ਦੀ ਭਿਆਨਕ ਲੁੱਟ ਤੋਂ ਬਾਅਦ ਪੁੱਛਗਿੱਛ ਕੀਤੀ ਗਈ ਹੈ। ਪੁਲਿਸ ਦੇ ਬੁਲਾਰੇ ਨੇ ਕਿਹਾ ਕਿ ਪੁਲਿਸ ਅਤੇ ਐਂਬੂਲੈਂਸ ਨੂੰ ਸਵੇਰੇ 7.30 ਵਜੇ ਦੇ ਕਰੀਬ ਵਾਰਦਾਤ ਦੀ ਰਿਪੋਰਟ ਮਿਲਣ ਤੋਂ ਬਾਅਦ ਇੱਕ ਵਿਅਕਤੀ ਨੂੰ ਗੰਭੀਰ ਸੱਟਾਂ ਨਾਲ ਹਸਪਤਾਲ ਲਿਜਾਇਆ ਗਿਆ। ਪੁਲਿਸ ਅਪਰਾਧੀਆਂ ਦਾ ਪਤਾ ਲਗਾਉਣ ਅਤੇ ਉਨ੍ਹਾਂ ਨੂੰ ਜਵਾਬਦੇਹ ਬਣਾਉਣ ਲਈ ਪੁੱਛਗਿੱਛ ਕਰ ਰਹੀ ਹੈ।
ਡੇਅਰੀ ਦੇ ਮਾਲਕ ਪੁਨੀਤ ਸਿੰਘ ਨੇ ਹੈਰਾਲਡ ਨੂੰ ਦੱਸਿਆ ਕਿ ਅੱਜ ਸਵੇਰੇ ਚਾਰ ਨਕਾਬਪੋਸ਼ ਲੁਟੇਰੇ ਦੁਕਾਨ ਵਿੱਚ ਦਾਖਲ ਹੋਏ। ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਨੇ ਉਸ ‘ਤੇ ਹਮਲਾ ਕੀਤਾ। ਸਾਡੇ ਕੋਲ ਧੁੰਦ ਦੀਆਂ ਤੋਪਾਂ (Fog Cannons) ਅਤੇ ਪੈਨਿਕ ਬਟਨ ਲਗਾਏ ਗਏ ਹਨ ਪਰ ਕਰਮਚਾਰੀ ਲਈ ਇਸ ਨੂੰ ਦਬਾਉਣ ਦਾ ਸਮਾਂ ਨਹੀਂ ਮਿਲਿਆ ਸੀ। ਉਹ ਸੁਰੱਖਿਆ ਲੱਭਣ ਲਈ ਪਿੱਛੇ ਵੱਲ ਭੱਜਿਆ, ਪਰ ਦੋ ਲੁਟੇਰਿਆਂ ਨੇ ਆਪਣੇ ਚਾਕੂਆਂ ਨਾਲ ਉਸ ਦਾ ਪਿੱਛਾ ਕੀਤਾ, ਉਸ ਨੇ ਆਪਣਾ ਬਚਾਅ ਕਰਨ ਲਈ ਆਪਣੇ ਹੱਥ ਖੜ੍ਹੇ ਕੀਤੇ ਅਤੇ ਉਦੋਂ ਹੀ ਉਨ੍ਹਾਂ ਨੇ ਉਸ ‘ਤੇ ਹਮਲਾ ਕੀਤਾ ਅਤੇ ਉਸ ਦੀਆਂ ਦੋ ਉਂਗਲਾਂ ਕੱਟੀਆਂ ਗਈਆਂ ਤੇ ਜ਼ਮੀਨ ‘ਤੇ ਡਿੱਗ ਗਈਆਂ। ਇਸ ਹਮਲੇ ‘ਚ ਉਸ ਨੇ ਆਪਣਾ ਅੰਗੂਠਾ ਅਤੇ ਇੰਡੈੱਕਸ ਉਂਗਲ ਗੁਆ ਲਈਆਂ ਹਨ। ਉਸ ਦਾ ਬਹੁਤ ਖ਼ੂਨ ਵਹਿ ਗਿਆ ਸੀ, ਹੁਣ ਵੀ ਜ਼ਮੀਨ ‘ਤੇ ਖ਼ੂਨ ਹੈ। ਸਿੰਘ ਨੇ ਕਿਹਾ ਕਿ ਵਰਕਰ ਪਿਤਾ ਬਣਨ ਵਾਲਾ ਹੈ, ਉਸ ਦੀ ਗਰਭਵਤੀ ਪਤਨੀ ਦੁਕਾਨ ‘ਤੇ ਆਈ ਅਤੇ ਉਹ ਸੱਚਮੁੱਚ ਪਰੇਸ਼ਾਨ ਸੀ।
ਸਿੰਘ ਨੇ ਕਿਹਾ ਕਿ ਜਿਵੇਂ ਹੀ ਮੈਨੂੰ ਉਸ ਦਾ ਫ਼ੋਨ ਆਇਆ, ਮੈਂ ਦੁਕਾਨ ਵੱਲ ਭੱਜਿਆ ਅਤੇ ਮੈਂ ਉਸ ਨੂੰ ਦੇਖਿਆ, ਉਹ ਚੀਕ ਰਿਹਾ ਸੀ ਅਤੇ ਰੋ ਰਿਹਾ ਸੀ। ਉਹ ਬੇਹੋਸ਼ੀ ਦੀ ਹਾਲਤ ‘ਚ ਅੰਦਰ-ਬਾਹਰ ਹੋ ਰਿਹਾ ਸੀ। ਸਿੰਘ ਨੇ ਕਿਹਾ ਕਿ ਲੁਟੇਰਿਆਂ ਨੇ ਦੁਕਾਨ ਤੋਂ ਵੱਡੀ ਗਿਣਤੀ ਵਿੱਚ ਸਿਗਰਟਾਂ ਅਤੇ ਤੰਬਾਕੂ ਉਤਪਾਦ ਚੋਰੀ ਕਰ ਲਏ ਹਨ। ਉਨ੍ਹਾਂ ਕਿਹਾ ਦੇਸ਼ ਦਾ ਕਾਨੂੰਨ ਖ਼ਰਾਬ ਹੈ, ਭਾਵੇਂ ਇਹ ਲੋਕ ਗ੍ਰਿਫ਼ਤਾਰ ਹੋ ਗਏ ਤਾਂ ਉਹ ਛੇ ਮਹੀਨਿਆਂ ਵਿੱਚ ਬਾਹਰ ਹੋ ਜਾਣਗੇ ਅਤੇ ਦੁਬਾਰਾ ਅਪਰਾਧ ਕਰਨਗੇ। ਕੋਈ ਸਖ਼ਤ ਕਾਰਵਾਈ ਨਹੀਂ ਹੈ ਅਤੇ ਪੁਲਿਸ ਕੋਲ ਕੋਈ ਸ਼ਕਤੀ ਨਹੀਂ ਹੈ। ਮੇਰਾ ਇੱਕ ਨੌਜਵਾਨ ਪਰਿਵਾਰ ਹੈ ਅਤੇ ਅਸੀਂ ਸਾਰੇ ਕੰਮ ‘ਤੇ ਆਉਣ ਤੋਂ ਡਰਦੇ ਹਾਂ ਪਰ ਸਾਡੇ ਕੋਲ ਕੋਈ ਵਿਕਲਪ ਨਹੀਂ ਹੈ, ਸਾਨੂੰ ਆਪਣੇ ਬਿੱਲਾਂ ਅਤੇ ਮੋਡਗੇਜ਼ ਦਾ ਭੁਗਤਾਨ ਕਰਨ ਦੀ ਲੋੜ ਹੈ। ਜੇ ਇਹ ਘਟਨਾਵਾਂ ਵਾਪਰਦੀਆਂ ਰਹੀਆਂ ਤਾਂ ਸਾਡੇ ਕੋਲ ਕੋਈ ਵਰਕਰ ਨਹੀਂ ਹੋਵੇਗਾ। ਸਿੰਘ ਨੇ ਕਿਹਾ ਕਿ ਸਰਕਾਰ ਨੂੰ ਹੋਰ ਲੋਕਾਂ ਦੇ ਮਰਨ ਦੀ ਉਡੀਕ ਕਰਨ ਦੀ ਬਜਾਏ ਤੁਰੰਤ ਕਾਰਵਾਈ ਕਰਨੀ ਚਾਹੀਦੀ ਹੈ।
ਜ਼ਿਕਰਯੋਗ ਹੈ ਕਿ ਪਿਛਲੇ ਮਹੀਨੇ ਰੋਜ਼ ਕਾਟੇਜ ਸੁਪਰੇਟ ਵਰਕਰ ਜਨਕ ਪਟੇਲ (34) ਨੂੰ ਸੈਂਡਰਿੰਗਮ, ਆਕਲੈਂਡ ਵਿਖੇ ਚਾਕੂ ਮਾਰ ਕੇ ਮਾਰ ਦਿੱਤਾ ਗਿਆ ਸੀ। ਜਿਸ ਨੂੰ ਲੈ ਕੇ ਸਰਕਾਰ ਖ਼ਿਲਾਫ਼ ਦੇਸ਼ ਭਰ ਵਿੱਚ ਥਾਂ-ਥਾਂ ਉੱਤੇ ਵਿਰੋਧ ਪ੍ਰਦਰਸ਼ਨ ਵੀ ਹੋ ਰਹੇ ਹਨ। ਮਾਰੇ ਗਏ ਡੇਅਰੀ ਵਰਕਰ ਦੇ ਨਾਲ ਇੱਕਜੁੱਟਤਾ ਵਿਖਾਉਣ ਲਈ ਡੇਅਰੀ ਅਤੇ ਰਿਟੇਲ ਵਰਕਰਜ਼ ਗਰੁੱਪ ਵੱਲੋਂ ਸਖ਼ਤ ਕਾਨੂੰਨ ਲਿਆਉਣ ਤੇ ਕਾਨੂੰਨ ‘ਚ ਬਦਲਾਅ ਦੀ ਮੰਗ ਨੂੰ ਲੈ ਕੇ ਦੇਸ਼ ਵਿਆਪੀ ਵਿਰੋਧ ਪ੍ਰਦਰਸ਼ਨ ਕੀਤੇ ਜਾ ਰਹੇ ਹਨ।
