ਭਾਰਤ ਆਪਣੀ ਧਰਤੀ ‘ਤੇ 12 ਸਾਲਾਂ ਬਾਅਦ ਟੈੱਸਟ ਲੜੀ ਹਾਰਿਆ
ਪੁਣੇ, 26 ਅਕਤੂਬਰ – ਭਾਰਤ ਸ਼ਨਿੱਚਰਵਾਰ ਨੂੰ ਉਦੋਂ 12 ਸਾਲਾਂ ਬਾਅਦ ਧਰਤੀ ਉੱਤੇ ਪਹਿਲੀ ਕ੍ਰਿਕਟ ਟੈੱਸਟ ਲੜੀ ਹਾਰ ਗਿਆ ਜਦੋਂ ਉਸ ਨੂੰ ਨਿਊਜ਼ੀਲੈਂਡ ਹੱਥੋਂ ਦੂਜੇ ਟੈੱਸਟ ਵਿੱਚ 113 ਦੌੜਾਂ ਦੀ ਸ਼ਿਕਸਤ ਖਾਣੀ ਪਈ। ਨਿਊਜ਼ੀਲੈਂਡ ਦੇ ਮਿਸ਼ੇਲ ਸੈਂਟਨਰ ਨੇ ਪੂਰੇ ਮੈਚ ਦੌਰਾਨ ਭਾਰਤ ਦੀਆਂ 13 ਵਿਕਟਾਂ ਝਟਕੀਆਂ, ਜਿਸ ਦੀ ਬਦੌਲਤ ਕੀਵੀ ਟੀਮ ਨੇ ਜ਼ੋਰਦਾਰ ਜਿੱਤ ਦਰਜ ਕਰਦਿਆਂ ਤਿੰਨ ਮੈਚਾਂ ਦੀ ਲੜੀ ਵਿੱਚ 2-0 ਦੀ ਅਜੇਤੂ ਲੀਡ ਬਣਾ ਲਈ ਹੈ।
ਭਾਰਤੀ ਟੀਮ ਮੈਚ ਜਿੱਤਣ ਲਈ 359 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਆਪਣੀ ਦੂਜੀ ਪਾਰੀ ਵਿੱਚ 245 ਦੌੜਾਂ ਉੱਤੇ ਹੀ ਢਹਿ ਢੇਰੀ ਹੋ ਗਈ। ਇਸ ਤਰ੍ਹਾਂ ਭਾਰਤ ਨੂੰ 12 ਸਾਲਾਂ ਬਾਅਦ ਆਪਣੀ ਹੀ ਸਰਜ਼ਮੀਨ ਉੱਤੇ ਕੋਈ ਟੈੱਸਟ ਲੜੀ ਹਾਰਨੀ ਪਈ ਹੈ। ਇਸ ਤੋਂ ਪਹਿਲਾਂ ਭਾਰਤ ਨੂੰ 2012-13 ਦੌਰਾਨ ਇੰਗਲੈਂਡ ਨੇ 2-1 ਨਾਲ ਹਰਾਇਆ ਸੀ।
